სიახლეები
ბოლო 24 საათი სირიაში, 13 თებერვალი
2020 / 02 / 13
ზურაბ ბატიაშვილი, რონდელის ფონდის მკვლევარი
- თურქეთის თავდაცვის მინისტრის განცხადებით, თურქეთი და რუსეთი შეთანხმდნენ ცეცხლის შეწყვეტაზე იდლიბში. მისივე სიტყვებით, ისინი აიძულებენ მხარეებს (მათ შორის ჯიჰადისტებსაც) მიიღონ აღნიშნული შეთანხმება (შეთანხმების სხვა დეტალები ჯერჯერობით უცნობია);
- რუსული ავიაცია განაგრძობდა იდლიბის პროვინციაში გამაგრებული ოპოზიციისა და ჯიჰადისტების დაბომვებს;
- ასადის რეჟიმის ძალებმა შეძლეს რამდენიმე დასახლებული პუნქტის აღება ქ. ალეპოს სამხრეთ-დასავლეთით;
- სირიის პარლამენტმა ერთხმად მიიღო რეზოლუცია, რომელშიც დაგმო XX საუკუნის დასაწყისში ოსმალეთის იმპერიაში მომხდარი ე.წ. „სომეხთა გენოციდი“;
- იდლიბში მიმდინარე კონფლიქტის ფონზე გაუფასურდა თურქული ლირა. 13 ტებერვალს 1 აშშ დოლარი 6,06 ლირა გახდა. სიტუაციის ესკალაციამდე ეს მაჩვენებელი 5,90-ის ფარგლებში მერყეობდა;
- თურქეთი განაგრძობდა დამატებითი სამხედრო ტექნიკისა და ცოცხალი ძალის შეყვანას იდლიბის პროვინციაში;
- ცუდი ბუნებრივი პირობების (სიცივის) მიუხედავად, იდლიბის მოსახლეობა განაგრძობდა გასვლას ქალაქიდან. თავშესაფრის არარსებობის გამო ღამით რამდენიმე დევნილი (მათ შორის ბავშვებიც) გაიყინა.